Aftur þurfti að kalla út frívakt á þyrluna

Tvisvar í þessari viku hefur Landhelgisgæslan þurft að kalla til frívaktir til að fara í björgunarflug á haf út. Dómsmálaráðherra hyggst ræða við forstjóra Landhelgisgæslunnar til að kanna hvort hægt sé að endurskoða leiðir til sparnaðar hjá þyrlusveitinni.

„Landhelgisgæslan þarf að hagræða og reksturinn er núna með þeim hætti sem forstöðumaðurinn lagði til við ráðuneytið. Þetta tilvik gefur okkur tilefni til að fara betur ofan í það hvernig hægt sé að hagræða í stofnuninni með öðrum hætti því mín skoðun er sú að björgunarþjónustan verður að vera með forsvaranlegum hætti,“ segir Ragna Árnadóttir dómsmálaráðherra.

Ragna vill ekki tjá sig sérstaklega um þær aðstæður sem komu upp á mánudagsnótt, þegar kalla þurfti til menn á frívakt til að hægt væri að fara í björgunarflug til að sækja fársjúka 67 ára gamla konu á portúgalskt farþegaskip, statt rúmar 80 sjómílur suður af Vestmannaeyjum. Staðfest hefur verið að um líf og dauða var þar að tefla.

Í fyrrinótt þurfti svo í annað sinn á jafn mörgum dögum að kalla til frívakt til að fara í björgunarflug á haf út. Í því tilviki var um grænlenska togarann Polar Nanoq að ræða þar sem einn úr áhöfninni var talinn vera með innvortis blæðingar.

Ragna hyggst ræða við Georg Lárusson, forstjóra LHG, vegna málsins og biðja hann um tillögur um hvernig hægt sé að hagræða með öðrum hætti en fækka þyrluvöktum úr sex í fimm, en vegna niðurskurðarins er ekki mögulegt að halda úti þeirri öryggisþjónustu sem hingað til hefur verið talin lágmark.

„Auðvitað verður Landhelgisgæslan að halda sig innan fjárheimilda, en sjófarendur verða að búa við öryggi og ekki spurning um neitt annað,“ segir Ragna.

Georg hefur ítrekað bent á hversu starfsemi LHG er viðkvæm fyrir breytingum á gengi krónunnar og sveiflum í eldsneytisverði.

Landhelgisgæslunni sé nauðugur sá kostur að draga saman seglin sem óumflýjanlega hefur áhrif á björgunargetu.

Steingrímur J. Sigfússon fjármálaráðherra hefur sagt í fjölmiðlum að auknar fjárframlögur til LHG komi ekki til greina í því efnahagsástandi sem þjóðin glímir við.svavar@frettabladid.is