Ancelotti fór beint til Ítalíu að hitta veikan föður sinn

Síðustu dagar í lífi Carlo Ancelotti, stjóra Chelsea, hafa verið honum erfiðir þar sem 86 ára gamall faðir hans, Guiseppe, er afar veikur og gæti verið að kveðja þennan heim.

Ancelotti hefur verið síðustu daga á Ítalíu hjá föður sínum og kom aðeins til Englands í dag til að stýra Chelsea. Hann fór svo beint aftur til Ítalíu eftir leikinn.

„Þetta hefur verið afar erfiður tími en svona er lífið. Ég vona að faðir minn verði betri á morgun. Þá er frídagur hjá mér og ég verð á Ítalíu og kem aftur á mánudaginn," sagði Ancelotti.

„Þetta eru erfiðir dagar en ég held að á mánudag muni mér líða betur og þá get ég verið áfram á Englandi."