Mikið hlegið á Korputorgi

Upptökur á sjónvarpsþættinum Hjá Marteini fóru fram á mánudaginn í sérstöku myndveri á Korputorgi. Þátturinn er tekinn upp fyrir framan áhorfendur í sal.

„Þetta gekk eiginlega vonum framar og það var miklu meira hlegið en maður þorði að vona. Ég er búinn að leika í á annað hundrað farsa-sýningum og þetta var alveg á pari við það og gott betur,“ segir Jóhannes Haukur Jóhannesson, einn aðalleikara þáttarins.

Auk hans eru Kjartan Guðjónsson, Edda Björg Eyjólfsdóttir, Maríanna Clara Lúthersdóttir og Katla Margrét Þorgeirsdóttir í stórum hlutverkum. Þættirnir sem voru teknir upp á mánudaginn voru númer 1 og 2 en þættir 3 og 4 voru teknir upp fyrst. „Þetta var gert til að við værum aðeins sjóaðri í fyrstu þáttunum,“ útskýrir Jóhannes en leikstjóri Hjá Marteini er Bjarni Haukur Þórsson.

Jóhannes segir það hafa verið eilítið skrítið að leika bæði fyrir vökulum augum sjónvarpsvélanna og áhorfenda. „Við hugsum fyrst og fremst um sjónvarpsvélarnar enda má ekki vera of mikill sviðsbragur á leiknum. Og munurinn er auðvitað sá að við fengum að taka atriðin upp tvisvar.“ Jóhannes segir það hafa komið sér á óvart hversu vel hafi gengið að fá fólk til að hlæja að sama brandaranum tvisvar. „Við bættum aðeins við í seinna skiptið og það virtist ganga upp.“

Jóhannes er nú á fullu við að leika í Hellisbúanum og nú þegar er búið að bæta við sýningum í Íslensku óperunni. Fullt var út úr húsi á þremur sýningum í Sjallanum fyrir norðan og leikarinn segir það kitla eilítið að fara meira út á land. Og það er ekki hægt að sleppa Jóhannesi án þess að spyrja leikarann hver ætti að leika hlutverk hans í amerísku útgáfunni af Reykjavik-Rotterdam. „Ég. Ef ekki finnst mér að Brendan Fraser ætti að gera það. Við erum það líkir og svo myndi Fraser líka fá hlutverk sem væri allt öðruvísi en það sem hann hefur gert hingað til. Svona svipað og var hjá mér.“