Fréttastofa braut ekki siðareglur

Siðanefnd Blaðamannafélags Íslands hefur úrskurðað að Lóa Pind Aldísardóttir fréttamaður og fréttastofa Stöðvar 2 hafi ekki gerst brotleg við siðareglur félagsins í umfjöllun um Minna mál Ágústu Johnsen og Mylluna í frétt og fréttaskýringu sem birtust þann 11. febrúar síðastliðinn.

„Í báðum tilvikum eru óréttmætir eða gagnrýniverðir viðskiptahættir á vegum innlendra framleiðenda til umfjöllunar í tengslum við átaksmerkingu Samtaka iðnaðarins „Íslensk framleiðsla" og aðrar vörumerkingar á misíslenskum varningi í hagnaðarskyni," segir í kærunni.

Taldi Myllan að margt benti til að umfjöllun um Minna mál byggði á fyrirfram mynduðum skoðunum fréttastofunnar og að fréttavinnslan hafi öðrum þræði miðast við að færa sönnur á því að Myllan stundi óréttmæta viðskiptahætti í hagnaðarskyni. Það væri mat forsvarsmanna Myllunnar að umrædd frétt og fréttaskýring fréttastofu Stöðvar 2 hafi ekki uppfyllt kröfur faglegs fréttaflutnings af vandasömu og vandmeðförnu málefni. Myllan, sem dreifingaraðili, og umrædd vara hafi að ósekju beðið álitshnekki vegna þessarar umfjöllunar Stöðvar 2 og hún bryti því í bága við 3. og 4. grein siðareglna Blaðamannafélags Íslands.

Siðanefnd taldi hins vegar að efnistök og rannsóknarvinna í þessari umfjöllun Stöðvar 2 yrði að teljast eðlileg og fullnægjandi.