Lokað vegna veðurs í Pósthússtræti

Pósthússtræti í Reykjavík er lokað fyrir bílaumferð í dag, 15. maí, vegna veðurblíðu og verður meira eða minna lokað um helgina. Í tilkynningu frá Reykjavíkurborg kemur fram að betri aðstaða fyrir gangandi og hjólandi sé eitt af Grænu skrefunum í Reykjavík.

„Betra rými skapast einnig fyrir þá sem vilja njóta Austurvallar og gestir veitingastaða, þar sem veitt er utandyra, eru þá ótruflaðir af bílaumferð. Tilraunir voru gerðar síðasta sumar með lokun Pósthússtrætis og féllu þær í góðan farveg. Nú hefur verið keyptur hentugur og varanlegur lokunarbúnaður og verður hann fljótlega settur upp í Pósthússtræti."

„Veitingahúsaeigendur segjast ánægðir með þetta framtak og tengja auknar vinsældir Austurvallar á sumrin við lokunina," segir Pálmi Freyr Randversson hjá Umhverfis- og samgöngusviði Reykjavíkurborgar. Til stendur að Pósthússtræti verði ætíð lokað fyrir bílaumferð á góðviðrisdögum í sumar.