Hodgson ætlar ekki að biðja um nýjan samning

Roy Hodgson liggur ekkert á að framlengja samning sinn við enska úrvalsdeildarfélagið Fulham.

Honum tókst að stýra liðinu frá falli fljótlega eftir að hann tók við liðinu og á síðasta tímabili varð Fulham í sjöunda sæti ensku úrvalsdeildarinnar. Það er besti árangur félagsins í deildinni frá upphafi.

Í gær var greint frá því að knattspyrnuyfirvöld í Noregi og Svíþjóð vildu fá hann í starf landsliðsþjálfara hjá sér en hann hafnaði þeim báðum.

Ástæðan var sú að hann væri ánægður með núverandi samning sinn hjá Fulham og hann sagði í samtali við enska fjölmiðla að honum lægi ekkert á að skrifa undir nýjan samning við Fulham af sömu ástæðum.

„Samningurinn rennur út í júní. Ég væri til í að halda bara áfram og sjá til hvað gerist í framhaldinu," sagði hann.