Einungis Samfylkingin hefur ákveðið að upplýsa um alla styrki

Samfylkingin er eini stjórnmálaflokkur landsins sem hyggst enn sem komið er birta upplýsingar um fjárstyrki til aðildarfélaga og fulltrúaráða flokksins vegna ársins 2006. Aðrir flokkar hafa ekki tekið ákvörðun um það hvort að upplýsingunum verði safnað saman og þær birtar opinberlega. Árið 2006 fóru fram sveitarstjórnarkosningar.

Vegna umræðu um risastyrki FL-Group og Landsbankans til Sjálfstæðisflokksins birtu Samfylkingin, Framsóknarflokkurinn og Sjálfstæðisflokkurinn yfirlit yfir fjárstyrki til landsflokkanna fyrir árið 2006. Jafnframt var upplýst að Vinstri grænir þáðu einn styrk umfram 500 þúsund krónur.

Í framhaldinu ákvað Samfylkingin að kalla eftir upplýsingum um fjárstyrki til aðildarfélaga og fulltrúaráða flokksins vegna ársins 2006. Magnús Norðdahl, gjaldkeri flokksins, segir að þeirri vinnu sé ólokið og hann geti ekki gefið nákvæma dagsetningu hvenær samantektin muni liggja fyrir.

„Það er talsvert af upplýsingum komið í hús en ekki allt. Þetta verður vonandi birt sem allra fyrst," segir Magnús sem jafnframt telur að allir flokkar eigi að birta samskonar upplýsingar og Samfylkingin safnar nú saman.

Framsókn hefur ekki tekið ákvörðun

Framsóknarflokkurinn hefur ekki tekið ákvörðun um að taka saman upplýsingar yfir fjárstyrkina. Sigfús Ingi Sigfússon, framkvæmdastjóri flokksins, segir að þessi mál verði tekin til umfjöllunar í landsstjórn Framsóknarflokksins á næsta fundi hennar síðar í mánuðinum.

Sjálfstæðisflokkurinn upplýsir hugsanlega um styrkina

„Við erum ekki búin að setja neina slíka vinnu í gang," segir Gréta Ingþórsdóttir, starfandi framkvæmdastjóri Sjálfstæðisflokksins, aðspurð hvort flokkurinn hafi ákveðið að taka saman umræddar upplýsingar. Hún segir að meiningin sé að flokkarnir komi sér saman um niðurstöðu í nefnd um endurskoðun laga um fjármál stjórnmálaflokkanna. Sjálfstæðisflokkurinn muni þó ekki endilega bíða eftir niðurstöðu nefndarinnar og hugsanlega birta yfirlit yfir styrkina.

„Formaðurinn hefur meðal annars sagt að hann sé tilbúinn til að opna bókhaldið einhver ár aftur í tímann," segir Gréta.



Engir styrkir umfram 500 þúsund til aðildarfélaga VG

Drífa Snædal, framkvæmdastýra Vinstri grænna, segir að enginn styrkur til flokksins árið 2006 hafi verið hærri en 500 þúsund krónur fyrir utan milljón krónu styrk frá Samvinnutryggingum. Þess vegna hafi hún ákveðið að kalla ekki eftir upplýsingum um fjárstyrki til aðildarfélaga flokksins. „Svæðisfélögin störfuðu undir sömu vinnureglum og flokkurinn um þetta 500 þúsund krónu mark og það fór ekkert yfir það."

Fjárframlög til flokksins í Reykjavík í aðdraganda borgarstjórnarkosninganna var á bilinu fjórar til fimm milljónir króna, segir Drífa. „Þar voru fjárhagslega stóru umsvifin."

Drífa útilokar ekki að upplýsingar um fjárstyrki til Reykjavíkurfélags flokksins árið 2006 verði teknar saman og birtar.