Ríkið þarf að greiða Kaupþingi tæpar 6 milljónir

Íslenska ríkið var í Héraðsdómi Reykjavíkur í dag dæmt til þess að endurgreiða Kaupþingi banka hf. tæpar 6 milljónir króna vegna oftekinna stimpilgjalda sem hefur verið innheimt ólöglega síðustu þrjátíu ár. Bankinn stefndi ríkinu vegna málsins en ríkið þarf einnig að greiða bankanum 1.700.000 krónur í málskostnað.

Málið snýst um stimpilgjöld á svokölluðum fjármagnsendurritum gerða þegar sýslumenn taka fjárnám hjá skuldurum. Héraðsdómur kemst að því að þessi gjaldtaka hjá ríkinu síðustu þrjátíu árin sé ólögmæt og gerir ríkinu skylt að endurgreiða stimpilgjöld vegna afskrifaðra mála.

Íslenska ríkinu er því gert að greiða 5.968.424 krónur ásamt vöxtum frá árinu 2004 og frá þingfestingardegi sem var fyrir ári síðan. Einnig þarf ríkið að greiða 1.700.000 krónur í málskostnað.

Hægt er að sjá dóminn hér.