Frjálslyndi flokkurinn skuldar sex milljónir

„Við erum ekkert hættir í pólitík þó við skuldum einhverjar milljónir. Það hefur oft komið fyrir áður að við skuldum peninga," segir Guðjón Arnar Kristjánsson, formaður Frjálslynda flokksins.

Flokkurinn skuldar rúmlega 6 milljónir króna og eru skuldirnar að mestu leyti tilkomnar vegna nýafstaðnar kosningabaráttu, segir Guðjón. Flokkurinn eyddi á bilinu 3 til 4 milljónum í auglýsingar.

Þá segir Guðjón að við síðustu áramót hafi flokkurinn nánast verið skuldlaus en fyrir tveimur árum námu skuldir flokksins rúmum 30 milljónum króna.

Frjálslyndi flokkurinn hlaut 2,2% atkvæða í kosningunum og náði því ekki 2,5% marki sem tryggir framboðum ríkisframlög. Magnús Reynir Guðmundsson, framkvæmdastjóri Frjálslynda flokksins, sagði nýverið í samtali við Fréttablaðið að þar með hafi flokkurinn orðið af 12 til 14 milljóna króna árlegum ríkisframlögum út kjörtímabilið.

Guðjón telur ólíklegt að Frjálslyndi flokkurinn fari í gjaldþrot. „Við höldum ekki að þetta sé óyfirstíganleg tala. Við ætlum okkur að vera búnir að ná þessu niður í haust."

Guðjón segir aðspurður að tapið verði meðal annars brúað með því að leitað verður til flokksfélaga. „Það eru 680 manns félagar í flokknum. Þannig að það þarf ekki stórar upphæðir frá hverjum og einum." Að auki væntir Guðjón þess að flokkurinn fá greidda styrki sem hafi ekki enn skilað sér.