Nýr sjónvarpsfréttatími á leið í loftið

Morgunblaðið og Skjár einn munu hefja útsendingar á sjónvarpsfréttatíma á Skjá einum í lok mánaðarins. Forsvarsmenn fyrirtækjanna undirrituðu samning þess efnis í gærdag. Fréttirnar verða sýndar á Skjá einum klukkan 18.50 alla virka daga og verða endursýndir klukkan 21.50.

Skjár einn telur að markaður sé fyrir fréttir frá Morgunblaðinu í sjónvarpi, að sögn Sigríðar Margrétar Oddsdóttur, framkvæmdastjóra Skjás eins. Þær dragi að sér áhorf og þar með auglýsingatekjur. Einnig vilji Skjár einn stuðla að frekari miðlun faglegra frétta í íslensku sjónvarpi. Þá er haft eftir Óskari Magnússyni, útgefanda Morgunblaðsins, að verkefnið sé góð leið til að styrkja bæði félögin. Fréttatíminn er tilraunaverkefni og verður framhaldið metið eftir áhorfsmælingum og auglýsingatekjum.

Óðinn Jónsson, fréttastjóri Ríkisútvarpsins, sagðist í viðtali á Pressunni fagna því ef fjölmiðlar geti aukið og bætt þjónustu við almenning. Hann sagðist jafnframt vonast til þess að verkefnið muni ekki auka rekstrarvanda blaðsins. „Líklega þykir skattborgurum nóg komið af afskriftum í ríkisbankakerfinu vegna fjölmiðla í eigu umsvifamanna sem komu hér öllu í þrot.“

Ari Edwald, forstjóri 365 miðla, sagði að sér litist vel á samkeppni og aukna fjölbreytni. Hann er hins vegar ósáttur við orð Óðins um rekstrarerfiðleika einkamiðla, og sagði hroka og rangfærslur koma frá RÚV um málið.

thorunn@frettabladid.is