Héraðsdómur dæmir handtöku löglega

Íslenska ríkið hefur verið sýknað af bótakröfu karlmanns sem taldi á sér brotið þegar lögreglan handtók hann á skemmtistaðnum Áttunni í Hafnarfirði í febrúar 2007. Maðurinn krafðist einnar milljónar króna í bætur.

Í lögregluskýrslu kemur fram að karlmaðurinn hafi verið handtekinn í kjölfar þess að hann hrinti lögreglumanni, eftir orðaskipti þeirra á milli, og gerði sig jafnframt líklegan til að ráðast á hann. Maðurinn hafi streist á móti við handtökuna og þurft hafi að halda honum í tökum þrátt fyrir að hann væri í handjárnum. Í annarri skýrslu lögreglu kemur fram að stefnandi hafi verið handtekinn til að koma í veg fyrir áframhaldandi brot á áfengislögum, nánar tiltekið ölvun á almannafæri.

Maðurinn viðurkenndi fyrir dómi að hafa neytt áfengis umrætt kvöld, að hafa átt orðaskipti við lögreglumann og að hafa ýtt við honum. Þess vegna telur Héraðsdómur að ekki sé hægt að fallast á þau sjónarmið mannsins að handtakan hafi verið ólögmæt og tilefnislaus. Þá féllst dómurinn ekki heldur á að handtakan hafi verið harkalegri en tilefni var til.