ESB málið gæti klofið þjóðina

„Enn eru hér alþingismenn sem kynntust því á yngri árum hvernig ágreiningur um tengslin við önnur ríki klauf þjóðina í herðar niður, sundraði samstöðu á örlagastundum," sagði Ólafur Ragnar Grímsson, forseti Íslands, við setningu Alþingis í dag. Forsetinn tiltók ekki hvaða ágreining hann átti við en vísast hefur deilan um aðild Íslands að Atlantshafsbandalaginu verið honum hugleikin.

„Allir vita að umræðan um aðild Íslands að Evrópusambandinu getur orðið, ef illa tekst til, efniviður í slíkan klofning," sagði Ólafur Ragnar. Öll meðferð málsins verði því að vera með þeim hætti að sem flestir verði sáttir. Rökin með og á móti aðild væru svo efnisrík að menn verði að virða sjónarmið hvers annars.

„Við þurfum öll að hafa í huga, hvaða stöðu sem við gegnum eða hver sem afstaðan er til aðildar, að í þessum efnum er það þjóðin sem ræður," sagði Ólafur Ragnar. Því þyrfti að búa málið vel fyrir þjóðina til að forðast eftir fremsta megni að úrslitin skilji eftir djúpstæða gjá.

Hlé var gert á þingfundi eftir að þingmenn hylltu forseta og fósturjörð og kjöri kjörbréfanefndar hafði verið lýst.