Bjóða í olíuleit á Drekasvæðinu

Þetta er fyrsta útboð á olíuleit og olíuvinnslu í íslenskri lögsögu en tilboðsfrestur rennur út klukkan sextán á morgun. Tilboðum á að skila til Orkustofnunar við Grensásveg.

Kristinn Einarsson, verkefnisstjóri olíuleitar hjá Orkustofnun, segir að þar séu menn vissulega spenntir. Ekkert tilboð hafði borist í dag en Kristinn sagði menn nokkuð vissa um að tilboð bærist, eitt eða fleiri. Það yrði því ekki alger ördeyða.

Fulltrúar hins norska Sagex Petrolium staðfestu síðdegis í samtali við Stöð 2 að þeir myndu taka þátt en þeir voru þá staddir á hótelherbergi í Reykjavík að leggja lokahönd á tilboðið sem verður í samvinnu við íslenskt félag, Lindir Exploration. Þá spá menn því að stærsta olíufélag Noregs, Statoil, verði með en sérfræðingar sem Stöð 2 ræddi við nýlega við í Noregi taldi að þaðan kæmu minnst eitt til tvö tilboð.

Kristinn Einarsson segir að fjárhagsumhverfið í heiminum sé þannig að ekki sé að búast við tugum tilboða.

Fyrir þá sem hug hafa á því að senda inn tilboð má geta þess að það kostar 150 þúsund krónur, að öðrum kosti er ekki tekið við því.

Tilboðin verða opnuð klukkan tvö á mánudag.