Fordæmir ríkisstjórnina fyrir að hitta ekki Dalai Lama

Birgitta Jónsdóttir þingmaður Borgarahreyfingarinnar fordæmir ríkisstjórnina fyrir að hitta ekki Dalai Lama trúarleiðtoga Tíbeta sem kom til landsins í gærkvöldi. Hún gagnrýnir einnig forgangsröðun forseta Íslands, sem hafi boðið Mörthu Stewart um landið en sé ekki viðstaddur þegar trúarleiðtogi útlægrar þjóðar Tíbeta heimsækir Ísland.

Birgitta Jónsdóttir stóð fyrir mótmælum við Kínverska sendiráðið á hverjum laugardegi í níu mánuði samfleytt til stuðnings tíbetsku þjóðinni. Upp úr því var hreyfingin Vinir Tíbets stofnuð sem efndi meðal annars til fjáröflunar fyrir móttökustöð landflótta Tíbeta í Indlandi á lokadegi Ólympíuleikanna.

Hún segir danska forsætisráðherrann hafa sýnt hugrekki en íslensku ríkissjtórnina en forsætisráðherra Danmerkur og utanríkisráðherra hittu Dalai Lama á föstudaginn.

Þess má geta að Björn Bjarnason fyrrverandi ráðherra rifjar upp á bloggsíðu sínni að hann hafi hitt sendimenn frá Tævan í tíð sinni sem menntamálaráðherra. Það hafi valdið slíku uppnámi hjá þáverandi sendiherra Kína að hann hafi staðið og flutt reiðilestur, ef ekki beinlínis öskrað af reiði í anddyri menntamálaráðuneytisins.

Ekki nefnir hann að frekari eftirmál hafi verið af fundinum með sendimönnum Tævana. Forseti Íslands er erlendis á Smáþjóðaleikunum en Birgitta telur að hann hefði átt að sjá ástæðu til að hitta andlegan leiðtoga Tíbeta.