Keane: Erum með sterkari leikmannahóp en Arsenal

Framherjinn Robbie Keane hjá Tottenham er byrjaður á sálfræðihernaði fyrir Lundúnaslaginn gegn Arsenal í ensku úrvalsdeildinni um helgina en hann lýsti því yfir á blaðamannafundi að leikmannahópur Tottenham væri sterkari en hjá Arsenal.

Keane segir ennfremur að markmið Tottenham sé skýrt og það sé að brjóta sér leið inn á topp fjögur í deildinni en liðið er einmitt sem stendur í fjórða sæti deilarinnar.

„Ef þú lítur yfir leikmannahópa Arsenal og Tottenham núna þá virðast þeir vera mjög svipaðir en Arsenal hefur alltaf haft smá forskot á okkur síðustu ár. Nú erum við alla vega á pari við þá og raunar held ég að við séum með sterkari menn á varamannabekknum en þeir.

Stefnan hjá okkur er að komast á topp fjögur í deildinni og þar erum við nú en það er of snemmt að vera að ráða eitthvað út úr því svo snemma móts. Ef við verðum enn á topp fjögur um jól þá erum við á réttri leið," segir Keane.