Berglind Icey til sölu á Ebay

„Takk fyrir að skoða og gangi þér vel að fá Berglindi Icey heim til þín!" - svona hljómar hluti af uppboðslýsingu á vefsíðunni Ebay.com.

Fyrirsætan og leikkonan Berglind Icey prýðir sérstakt safnaraplakat bjórframleiðandans St. Pauli sem er nú boðið upp á eBay. Plakatið er frá 2004 og í óaðfinnanlegu ástandi, enda hefur það aldrei verið svo lítið sem hengt á vegg.

Enginn hefur enn þá boðið í plakatið, en uppboðið hófst fyrir skömmu og á eftir að standa í 26 daga. Seljandinn vill fá að minnsta kosti um 370 krónur fyrir plakatið, sem er veglegt, tæpir 70 sentimetrar á hæð og 50 á breidd og sýnir Berglindi brosandi með bakka af bjórflöskum.

Lítið hefur frést af Berglindi undanfarið en hún býr í stjörnuborginni Los Angeles í Bandaríkjunum. Hún hefur komið fram í sjónvarpsþáttum á borð við According to Jim. sem sýndur er á Skjá einum og Watching Ellie, sem var með Seinfeld-leikkonunni Juliu Louis-Dreyfus í aðalhlutverki. Þá kom hún fram í grínmyndunum The Hot Chick, The Animal og The Master of Disguise. - afb