Sveppi í nýju barnaleikriti Gísla Rúnars

Kvikmyndin Algjör Sveppi og leitin að Villa verður frumsýnd á fimmtudaginn, en stjarnan Sveppi er strax farinn að pæla í næsta verkefni. Hann er ekkert að flækja hlutina og breytir bara endingunni: fer úr Algjör Sveppi í Algjör sveppur.

„Já, það stendur til að setja upp nýja leikgerð eftir Gísla Rúnar Jónsson, sem hann hefur gert upp úr plötunni Algjör sveppur,“ segir Sveppi. Platan kom út árið 1978 og er fyrir löngu orðin klassísk. „Það er svona verið að skoða handritið núna og fikta í því,“ segir Sveppi sem mun leika aðalhlutverkið. Björgvin Franz Gíslason leikur á móti honum, Felix Bergsson leikstýrir og Jón Ólafsson sér um tónlistina. Sveppi segir að frumsýnt verði fljótlega eftir áramót en ekki er búið að ákveða hvar verður sýnt.

En er Sveppi ekkert orðinn leiður á að vera alltaf í barnasýningum? „Ég neita því ekki að ég var kominn með hálfgert ógeð eftir Kalla á þakinu og Gosa, en svo kemur bara alltaf eitthvað nýtt ögrandi verkefni. Dramatísku hlutverkin eru heldur ekkert að heilla mig. Mig myndi ekkert langa til að leika í Sjálfstæðu fólki. Mig langar ekkert að leika í einhverju sem mér finnst leiðinlegt. Ég er söngleikjavitleysingur og ætli Frank-N-Furter sé ekki bara draumahlutverkið.“

En hvað með nýju bíómyndina – er hún jafn góð og Skoppa og Skrítla? „Þeirra mynd er fyrir eins árs og upp úr, en mín er fyrir þriggja ára og upp úr, svo þetta er ekki samanburðarhæft,“ segir Sveppi. „Þótt myndin sé fyrir börn verður að vera eitthvað fyrir fullorðna líka. Eftir að ég fór að fara með krakkana mína í bíó fattaði ég að það eru bestu myndirnar sem maður hefur gaman af að fara á sjálfur, eins og sumar þessara Disney-mynda, Shrek, Toy Story og Ice Age svo ég nefni eitthvað. Það er sumt í Algjörum sveppi sem bara fullorðnir skilja.“- drg