Drekaútboðið stórkostlegur áfangi

Þetta fyrsta olíuleitarútboð í sögu Íslands hófst í janúar og þegar klukkan var að nálgast fjögur í dag biðu menn spenntir í anddyri Orkustofnunar að sjá hve margir myndu að sækja um.

Þegar klukkan sló fjögur höfðu tvær umsóknir borist. Kristinn Einarsson, verkefnisstjóri olíuleitar, sagði menn mjög ánægða með að tvær umsóknir skyldu hafa borist um sérleyfi til olíuleitar.

Stjórnarmaður hins norska Sagex Petrolium sagði Stöð 2 að félagið hefði lagt inn umsókn í morgun. Blaðafulltrúi Statoil, Kai Nielsen, sagði hins vegar síðdegis að Statoil hefði ekki sótt um. Nafn hins umsækjandans fá menn að vita á mánudag þegar tilboðin verða opnuð.

Kristinn segir að vitað sé um fleiri félög sem hefðu haft áhuga ef þeim hefði tekist að afla sér fjár til að taka þátt í þessu. Orkustofnun eigi þá von á að heyra frá þeim síðar. Tvær umsóknir sé hins vegar alveg nóg til að byrja.

Guðni A. Jóhannesson orkumálastjóri segir félögin traust. Þau meti líkurnar það góðar að þau vilji fjárfesta í þessu. Það sé dýrt og erfitt að fara af stað og þetta sé fjárfesting til langs tíma. Hann segir þetta viðurkenningu á þeim rannsóknum sem unnar hafa verið á Drekasvæðinu. Þegar næst verði boðið út verði þetta ekki óþekkt svæði heldur svæði þar sem fyrirtæki hafi verið þegar inni. Þetta sé stórkostlegur áfangi að ná þessum viðskiptum einmitt núna.