Ferðaviðvörun til Mexíkóborgar aflétt

Viðbúnaðarstig vegna inflúensu A, sem áður var kölluð svínaflensan, er óbreytt hér á landi frá því sem verið hefur vegna þess að inflúensan hefur breiðst út til margra landa. Hins vegar er faraldurinn í Mexíkó í rénun og því hefur verið ákveðið, af heilbrigðisyfirvöldum hér á landi, að aflétta viðvörun til ferðamanna um að ferðast ekki til Mexíkó að nauðsynjalausu. Enn sem komið er hefur veiran ekki greinst hér á landi og enginn lagst inn á Landspítala með alvarleg inflúensulík einkenni. Engin viðvörun er nú í gildi um ferðalög til annarra landa.

Almannavarnadeild Ríkislögreglustjóra hvetur ferðamenn til að gæta fyllsta hreinlætis á ferðum sínum erlendis, forðast náið samneyti við veika einstaklinga, þvo sér oft um hendur og/eða nota handspritt. Þar sem óvíst er að notkun almennings á andlitsgrímum dragi úr líkum á smiti er ekki hvatt til notkunar þeirra. Notkun heilbrigðisstarfmanna á andlitsgrímum, og grímunotkun sjúklinga með inflúensulík einkenni, getur hins vegar dregið úr smithættu.

Þar sem sýking af völdum inflúensunnar virðist vera væg, er ekki sérstök ástæða til að reyna að hefta komu hennar til Íslands. Því hefur verið ákveðið að draga úr vaktþjónustu í Leifsstöð. Frá og með deginum í dag, 15. maí 2009, verða heilbrigðisstarfsmenn einungis á bakvakt fyrir Leifsstöð en vaktþjónustu í stöðinni verður hægt að endurvekja með stuttum fyrirvara ef þörf krefur.