Ásta kjörin forseti Alþingis

Ásta R. Jóhannesdóttir, þingmaður Samfylkingarinnar, var kjörin forseti Alþingis á fimmta tímanum í dag. Alls greiddu 59 þingmenn Ástu atkvæði sitt. Þrír greiddu ekki atkvæði og einn var fjarverandi. Ásta tók við fundarstjórn strax að því loknu. Ásta sagðist meta traustið mikils og að hún vænti góðs samstarfs við starfsfólk Alþingis.



Konur mynda forsætisnefnd Alþingis

Varaforsetar þingsins voru einnig kjörnir en það eru allt konur:

1. Ragnheiður Ríkharðsdóttir, þingmaður Sjálfstæðisflokksins,
2. Þuríður Backman, þingmaður VG,
3. Steinunn Valdís Óskarsdóttir, þingmaður Samfylkingarinnar,
4. Siv Friðleifsdóttir, þingmaður Framsóknarflokksins,
5. Álfheiður Ingadóttir, þingmaður VG og
6. Unnur Brá Konráðsdóttir, þingmaður Sjálfstæðisflokksins.

Borgarahreyfing bauð fram með meirihlutanum

Þá var einnig kjörið í aðrar fastanefndir þingsins með listakosningu. Bornir voru upp tveir listar í öllum tilfellum, listar A og B. Þingmenn Borgarahreyfingarinnar mynduðu lista A með þingmönnum stjórnarmeirihlutans, en þingmenn Sjálfstæðisflokksins og Framsóknarflokksins mynduðu saman B lista.