Verði útibú erlendra banka

Vilhjálmur Egilsson, framkvæmdastjóri Samtaka atvinnulífsins, telur heppilegt fyrir atvinnulífið að íslensku ríkisbankarnir færist í eigu erlendra banka og verði jafnvel útibú frá þeim.

Nauðsynlegt sé að bankarnir geti fjármagnað sig á góðum kjörum og margir erlendir bankar njóti mun betra lánshæfismats heldur en íslenska ríkið.

„Það skiptir höfuðmáli að íslenskir bankar hafi aðgang að erlendum lánsfjármörkuðum og öruggasta leiðin til þess er að þeir verði í eigu erlendra banka og jafnvel útibú frá þeim í stað þess að vera sjálfstæð fyrirtæki."

Hætta sé á að bankarnir einangrist á alþjóðavettvangi verði þeir áfram í ríkiseigu.

Endurskipulagning bankanna er meðal þess sem Samtök atvinnulífsins leggja áherslu á í stöðugleikaviðræðum stjórnvalda og aðila vinnumarkaðarins.

Vilhjálmur segir stjórnvöldum vandinn ljós og að þau vinni að því að finna lausn á eignarhaldi bankanna til frambúðar.

Steingrímur J. Sigfússon fjármálaráðherra segir engum dyrum hafa verið lokað í þessum málum.

„Erlendir kröfuhafar eru aðeins komnir inn í bankana í gegnum samningana um Sparisjóð Mýrasýslu, þannig að vísir að þessu er til staðar. Hins vegar er alveg ósýnt um hvort þeir hafa áhuga á að vera þátttakendur í bankakerfinu. Eins er ekki víst að þeir aðilar sem við vildum helst fá til samstarfs séu áhugasamir um að vera meðeigendur. Þetta verður bara að skýrast, og gerir það vonandi fljótlega."

- bþf, kg