Fundu merkan gullhring við Fornleifagröft

Mikið magn af gripum hefur komið fram við fornleifarannsókn umhverfis Þingvallakirkju, sem staðið hefur yfir að undanförnu, í tilefni af 150 ára afmæli kirkjunnar.

Í fréttatilkynningu frá Þingvallakirkju kemur fram að merkasti gripurinn sé 12 karata innsiglishringur úr gulli sem fannst milli hellna fyrir framan kirkjuna. Líklegt er að hringurinn hafi borist með jarðlagi sem flutt var á staðinn. Steinninn í hringnum er af gerðinni "heliotrop", stundum nefndur blóðsteinn.

Þá segir í tilkynningunni að síðustu daga hafi verið að koma í ljós eldstæði í uppgreftinum, en uppgröfur þar standi enn yfir.