Þingmenn úr Borgarahreyfingunni og VG mættu á Siðmenntarfund

Fjórir þingmenn mættu á hugvekju sem Jóhann Björnsson heimspekingur hélt á vegum Siðmenntar fyrir þingmenn sem kusu að vera ekki viðstaddir guðsþjónustu áður en guðsþjónusta hófst í dag. Það voru Margrét Tryggvadóttir, Birgitta Jónsdóttir og Þór Saari, þingmenn Borgarahreyfingarinnar og Lilja Mósesdóttir þingmaður VG.

„Ég var bara mjög ánægður, það mætti fullt af öðru fólki líka. Til dæmis Hörður Torfason," segir Sigurður Hólm Gunnarsson, stjórnarmaður í Siðmennt. „Við höfum ákveðið að gera þetta að árlegum viðburði. Það er nauðsynlegt að bjóða upp á val ár hvert. Við höfum fengið gríðarlega góð viðbrögð," segir Sigurður.

Sigurður segist hafa heyrt af því að þrýst hafi verið á fólk úr einhverjum þingflokkum að mæta ekki á hugvekjuna og það hafi komið í veg fyrir að hugvekjan yrði enn fjölmennari.