Bara fuglinn fljúgandi kemst á sjúkrahúsið

Bæjarstjórn Vesturbyggðar mótmælir harðlega fyrirhugaðri sameiningu Heilbrigðisstofnunarinnar á Patreksfirði við Heilbrigðisstofnunina á Ísafirði og bendir á að á milli sunnan- og norðanverðra Vestfjarða komist enginn nema fuglinn fljúgandi í allt að 8 mánuði á ári vegna erfiðra samgangna. Vegagerðin hafi nýlega ákveðið að minnka vetrarþjónustu á þessari leið vegna sparnaðar og verði því ekkert mokað yfir vetrarmánuðina en þarna á milli eru meðal annars Hrafnseyrar- og Dynjandisheiði. Bæjarstjórnin kveðst styðja alla viðleitni til sparnaðar en fyrr eigi að reyna allt annað en vonlausa sameiningu sem engu skili nema skertri þjónustu og dýrari.

Stjórn Samtaka sunnlenskra sveitarfélaga lýsir sömuleiðis mikilli óánægju með sameiningu heilbrigðisstofnana sunnanlands og bendir á að samgöngum við Vestmannaeyjar sé þannig háttað að til þess að komast á Selfoss þurfi Eyjamenn að ferðast í um 4 tíma. Þá telja sunnlenskir sveitarstjórnarmenn einsýnt að vegna landfræðilegrar sérstöðu Vestmannaeyja og Hornafjarðar verði ekki um samrekstrarmöguleika að ræða milli þessara stofnana.