Tíu þúsund manns flýja skógarelda á Grikklandi

Fjölmörg heimili norðaustan Aþenu, höfuðborgar Grikklands, urðu skógareldum að bráð í nótt og í morgun. Illa gengur að ná tökum á eldunum. Grískt yfirvöld fyrirskipuðu í morgun að tíu þúsund manns skyldi flytja á brott frá heimilum sínum.

Skógareldarnir kviknuðu í fyrrakvöld í þorpi um fjörutíu kílómetrum norðaustur af grísku höfuðborginni. Vindasamt var á svæðinu og varð það til að eldarnir breittust hratt út og til nærliggjandi þorpa rétt fyrir utan Aþenu og einni til úthverfa í norðaustur hluta borgarinnar.

Sökum þess hve hvass hefur verið hefur slökkviliðsmönnum gengið illa að ná tökum á eldunum. Í nótt brunnu fjölmörg heimili nærri borginni og stór ræktarlönd urðu eldnunum að bráð. Mörg hundruð íbúar á svæðinu flúðu heimili sín í nótt. Þykkur reykjarmökkur liggur nú yfir hluta grísku höfuðborgarinnar.

Grísk yfirvöld hafa lýst yfir neyðarástandi í Austur-Attiku sem hluti Aþenu tilheyrir. Þar hafa rétt ríflega hundrað og tuttugu ferkílómetrar af skóglendi og ólífuræktarlandi brunnið. Grikkir hafa beðið bandamenn um aðstoð í baráttunni við eldana og er í dag búist við fimm flugvélum frá Frakklandi, Ítalíu og Kýpur sem nota á ásamt grískum flugvélum og þyrlum til að kasta vatni á logana.

Skógareldar eru tíðir í Grikklandi á sumrin þegar hitnar í veðri og þurrt er. Eldarnir nú vekja sárar minningar frá því fyrir tveimur árum þegar sextíu og fimm manns fórust í mannskæðustu skógareldum í landinu í manna minnum.