Mikilvægt að horfa yfir flokkslínur

Illugi Gunnarsson, formaður þingflokks Sjálfstæðisflokksins, kveðst bjartsýnn á að tillögur flokksins nái eyrum stjórnarliða á þingi. „Þetta er þannig verkefni að stjórnmálamenn verða að horfa yfir flokkslínur.“

Hann segir Ísland eiga góð tækifæri til að vinna sig hratt út úr vandanum en þá verði að grípa til réttra aðgerða.

Niðurskurðaraðgerðir eru ekki útfærðar í tillögunum. Illugi segir það ekki á færi stjórnarandstöðu að skila frá sér frágengnu fjárlagafrumvarpi en mikilvægt sé að ekki verði skorið niður flatt heldur með markvissum og skynsamlegum hætti. Skoða verði hvert ráðuneyti og hverja stofnun fyrir sig.

Um lánamál segir Illugi dæmin sanna að hættulegt sé að ráðast í risavaxnar lántökur til að halda uppi gengi gjaldmiðils. Affarasælla sé að fá aðgang að lánalínum. Við það lækki vaxtabyrði og ásamt með öðrum aðgerðum skapist skilyrði til vaxtalækkana.

Illugi segir gengi gjaldmiðla ráðast af trausti á efnahag þjóða og með nýtingu auðlinda, mannauðs og öflugri framleiðslu skapist slíkt traust. Ráðast þurfi í þær framkvæmdir sem þegar séu á teikniborðinu og hverfa frá áformum um skattahækkanir á atvinnulífið.