Háð því að lán fáist á sæmandi kjörum

„Það er alveg ljóst að þetta háir stýrivextir eru alveg óviðráðanlegir bæði fyrir heimili og fyrirtæki í landinu,“ segir Sigurður Jóhannesson, framkvæmdastjóri SAH afurða ehf. á Blönduósi.

Hann segir fyrirtækið jafnvel vera háðara vöxtum en mörg önnur.

„Við erum í raun að kaupa inn 90 prósent af okkar hráefni á tveimur mánuðum og greiða það þá út. Til þess þurfum við náttúrulega lánsfé á skikkanlegum kjörum til að þetta verði ekki allt of dýrt. En sú varð raunin í fyrra. Það er jafn ljóst að ef stýrivextir eru lágir þá er mun auðveldara fyrir okkur að halda fólki í vinnu og reka þessi fyrirtæki með ásættanlegri niður­stöðu fyrir alla aðila.“

Hann segir einnig að stýrivextir hafi bein áhrif á matvöruverð.

Það er alveg klárt, vextir eru einn af okkar útgjaldaliðum og ef okkur tekst að draga úr þeim kostnaði myndi það skila sér til neytenda.“

Jafnan starfa um 40 manns hjá fyrirtækinu nema þegar sláturtíðin stendur yfir í september og október en þá bætast 60 manns við starfsmannahópinn.

Fréttablaðið ræddi við framkvæmdastjóra og stjórnarmenn fleiri fyrirtækja á landsbyggðinni sem tóku í sama streng. Einn sagðist ekki vilja tjá sig þar sem nóg væri komið af svartnættistali.- jse