Ríkisfyrirtæki bíða úrskurðar kjararáðs

Stjórnir fyrirtækja í eigu ríkisins fara yfir tilmæli ríkisstjórnarinnar um að lækka laun helstu stjórnenda á næstunni. Talið er að niðurstaða kjararáðs varðandi launalækkun æðstu embættismanna og stórra hópa í þjónustu ríkisins geti lagt línuna fyrir ríkisfyrirtæki og er því beðið eftir niðurstöðu kjararáðs. Undirbúningur kjararáðs hefst á næstunni og má búast við að niðurstaða liggi fyrir síðar í janúar.

Tilmæli stjórnvalda verða tekin fyrir í stjórn Landsvirkjunar um miðjan janúar. Ingimundur Sigurpálsson, formaður stjórnar Landsvirkjunar, segir að niðurstaðan geti farið eftir því hvernig úr spilast hjá kjaradómi. Hann vill sjá hvernig það fer. Einnig geti skipt máli við ákvarðanatökuna hvernig launaþróunin hafi verið og hvort viðkomandi hafi nýlega notið launahækkunar eða ekki. Annað sé að taka nýlega hækkun af mönnum en að lækka laun manna sem ekki hafi fengið hækkun lengi.

Ólafur Sveinsson, stjórnarformaður Flugstoða, segir að Flugstoðum hafi ekki borist formlegt erindi frá ríkisstjórn eða kjaranefnd. Stjórnin taki málið fljótlega fyrir og í kjölfarið ræði hann við eigandann hafi ekki formlegt erindi borist.

Stjórn Keflavíkurflugvallar ohf. hefur samþykkt lækkun stjórnarlauna um tíu prósent en óráðið er um frekari aðgerðir. Hlynur Sigurðsson, framkvæmdastjóri Fríhafnarinnar, telur að Fríhöfnin fylgi sennilega ákvörðun móðurfélagsins.

Bankaráð Seðlabankans lækkar laun bankastjóra um fimmtán prósent frá áramótum og út næsta ár. Laun bankastjóra verða tæplega 1,2 milljónir og formanns bankastjórnar tæplega 1,3 milljónir.

Stjórnmálamenn allra flokka nema Frjálslynda flokksins virðast fylgjandi launalækkun. Guðjón Arnar Kristjánsson, formaður Frjálslynda flokksins, telur réttara að hækka skatta. „Vitlaus aðferð,“ segir hann. Betra hefði verið að setja hátekjuskatt, þrepaskipt skattkerfi með meiri skattlagningu á tekjur yfir ákveðinni upphæð, og komast þannig hjá deilum sem nú séu fyrirsjáanlegar við ýmsar stéttir.

Ögmundur Jónasson, formaður BSRB, er fylgjandi því að lækka hæstu launin en hækka lægstu launin. „Við stöndum frammi fyrir alvöruvanda sem við þurfum að taka á í sameiningu,“ segir hann.

ghs@frettabladid.is