Samræmdar aðgerðir ræddar

Svæðisáætlanir um viðbrögð vegna svínaflensufaraldurs verða ræddar á fundum um allt land á komandi dögum.

Fulltrúar sóttvarnalæknis og almannavarnadeildar ríkislögreglustjóra munu hitta sóttvarnalækna, lögreglustjóra, forystumenn sveitarfélaga og heilbrigðisstarfsmenn á alls fimmtán fundum víðs vegar um landið til að ræða svæðisáætlanir um viðbrögð vegna inflúensufaraldurs. Þannig á að samræma aðgerðir í héraði og á landsvísu ef svínainflúensa eða önnur álíka inflúensa breiðist út hérlendis.

Ríflega nítján þúsund tilfelli af svínaflensunni höfðu verið greind í heiminum í gær. Þar af voru 605 í ríkjum ESB og EFTA. Skráð dauðsföll af völdum veikinnar voru orðin 117 talsins, þar af 97 í Mexíkó, sautján í Bandaríkjunum, tvö í Kanada og eitt í Kosta Ríka. Á Íslandi hefur einungis eitt tilfelli sýkingar verið staðfest.

Viðbúnaðarstig hér á landi er óbreytt, samkvæmt upplýsingum sóttvarnalæknis og unnið verður áfram samkvæmt hættustigi. Ekki er gert ráð fyrir auknum viðbúnaði hér á næstunni þar sem inflúensufaraldurinn er vægur.

- jss