Skattahækkanir kynntar innan viku

„Það er ekki komin niðurstaða í hvar við munum skera niður, eða hvar skattahækkanir verða, en það skýrist á allra næstu dögum,“ sagði Jóhanna Sigurðardóttir forsætisráðherra á blaðamannafundi ríkisstjórnarinnar í gær. Jóhanna sagði ríkisstjórnina vera að skoða niðurskurð í ríkisfjármálum og skattahækkanir í samráði við aðila vinnumarkaðarins, en halli á ríkissjóði stefnir í að verða tuttugu milljörðum meiri en gert var ráð fyrir í síðustu fjárlögum, það er 170 milljarðar í stað 150 milljarða.

Til að bregðast við þessum aukna halla mun ríkisstjórnin bæði leggja til hækkanir á sköttum sem og niðurskurð í ríkisfjármálum. „Fyrstu aðgerðir á sviði tekjuöflunar kemur fljótlega. Síðan kemur viðameira frumvarp sem felur í sér væntanlega einhverja frekari tekjuöflun og sparnaðaraðgerðir. Í þriðja lagi kemur svo skýrslan um efnahagsáætlun í heild sinni, bæði fyrir 2010 og fram til 2013. Þar verða í meginatriðum útfærðar þær leiðir sem á að fara í sparnaði og niðurskurði,“ sagði Steingrímur J. Sigfússon fjármálaráðherra.

Hvorugt þeirra vildi útskýra nánar í hverju skattahækkanirnar eða niðurskurðurinn fælist. „Sumt af þessu er bara þannig að það verður bara að birtast þegar það birtist og framkvæmist,“ sagði Steingrímur. Hann benti þó á að meiri háttar breytingar á sumum skattstofnum verði að falla á fjárlaga- og skattaáramót, sem er uum hver áramót. „Það er ekki hægt að breyta álagningu tekjuskatts á miðju ári nema með miklum vandkvæðum,“ sagði hann.

„Stærðargráða vandans er slík að menn munu ekki ná árangri nema bera niður á mjög breiðum almennum forsendum,“ sagði Steingrímur en ítrekaði, líkt og Jóhanna hafði gert áður, að markmiðið sé að hlífa mikilvægustu þáttum velferðarþjónustunnar og dreifa skattahækkunum á þá sem frekar eru aflögufærir.

„Það er okkar ásetningur að hefjast strax handa við að takast á við þennan halla, því ef ekkert verður gert í þeim efnum, þá bætist hann bara við þann vanda sem menn þurfa þá að glíma við um áramótin,“ sagði Steingrímur.

svanborg@frettabladid.is