Icesave rætt í fyrsta lagi á fimmtudag

Guðbjartur Hannesson, formaður fjárlaganefndar, segir að nefndin sé að vinna eins fljótt og hægt er að því að klára vinnu við nefndarálit um Icesave-samninginn. Álitið verður tilbúið í fyrsta lagi á miðvikudaginn, að sögn Guðbjarts.

„Ég vil meina að allt sem við þurfum til að taka ákvörðun liggi fyrir. Þá er bara að skrifa nefndarálit og hugsanlega gera tillögur að breytingum á frumvarpinu," segir Guðbjartur. Hann segir að reynt verði að ná breiðari sátt um málið.

Til dæmis finnist mönnum að setja eigi endurskoðunarákvæði í samninginn. Verið er að skoða hvort ákvæðið muni fella samninginn. Telur Guðbjartur að málið fari til þriðju umræðu í fyrsta lagi á fimmtudag eða tefjist jafnvel fram í næstu viku.

Fjárlaganefnd fundar á morgun en nefndarálit er ekki hægt að skrifa fyrr en nefndarálit koma frá efnahags- og skattanefnd og utanríkismálanefnd. Álit fjárlaganefndar um Icesave er meðal annars unnið upp úr hinum tveimur álitunum.

Helgi Hjörvar, formaður efnahags- og skattanefndar, segir að nefndin hafi lokið við að hitta gesti og verið sé að leggja lokahönd á umsögn nefndarinnar. Nefndin hefur haft málið til umfjöllunar í hálfan mánuð.

„Ég reikna með að þetta verði rætt í nefndinni á morgun eða í síðasta lagi á þriðjudaginn til að kanna hvort það er samstaða um álitið," segir Helgi, sem setur þó þann fyrirvara að þetta gæti tekið lengri tíma.

Ólöf Nordal, þingkona Sjálfstæðisflokksins og fulltrúi í fjárlaganefnd, vill fresta málinu fram á haust. Vill hún að fjárlaganefnd noti sumarið „til að vinna að þessu af einhverju viti" og þingið klári þetta á septemberþinginu.

„Samkvæmt samningnum þurfum við að afgreiða þetta á sumarþingi, en því lýkur 15. september. Það þýðir að við myndum hafa tvær vikur í september til að afgreiða þetta í staðinn fyrir að keyra þetta áfram án þess að vera búin að svara grundvallarspurningum um sjálfan samninginn," segir Ólöf. vidirp@frettabladid.is