Segir ráðuneyti hafa lokaorðið

Kristján Sveinbjörnsson, sem sagði af sér sem forseti bæjarstjórnar Álftaness í desember og dró sig í hlé sem bæjarfulltrúi, segir málinu um endurkomu sína í bæjarstjórn ekki lokið þótt bæjarstjórnin líti þannig á að hann geti ekki tekið sæti sitt aftur á þessu kjörtímabili.

Kristján segist hafa dregið sig tímabundið í hlé að ósk félaga sinna en ekki hafa tímasett endurkomu. Bæjarstjórnin segir hins vegar að leyfið hafi verið ótímabundið. Kristján bendir á að hann hafi óskað eftir því að ráðuneyti sveitarstjórnarmála úrskurði í málinu. „Málinu er ekki lokið fyrr en ráðuneytið hefur úrskurðað,“ segir hann í bréfi til Fréttablaðsins.- gar