Guðlaugur og Árni falla niður um sæti á framboðslistum

Tveir þingmenn Sjálfstæðisflokks féllu niður um sæti vegna útstrikana í alþingiskosningum laugardags.

Guðlaugur Þór Þórðarson, efsti frambjóðandi í Reykjavíkurkjördæmi suður, fellur niður í annað sætið. Árni Johnsen í Suðurkjördæmi fellur úr öðru sæti í það þriðja. Þeir komast þó báðir á þing.

Aðrar útstrikanir höfðu ekki áhrif á stöðu þingmanna.

Mikið hafði verið rætt um stöðu Steinunnar Valdísar Óskarsdóttur, frambjóðanda Samfylkingar, en hún féll ekki niður um sæti, þrátt fyrir margar útstrikanir.

„Fréttirnar af þessum útstrikunum hjá mér voru kannski dramatískari en raunveruleikinn," segir hún. „Ég held að kjósendur hafi uppgötvað þessa leið og beitt henni og það er hið besta mál. Ég fæ þessar útstrikanir líklega út af styrkjaumræðunni, hvort sem það er að ósekju eða ekki. Ég læt aðra um að dæma það, en ég held að ekki hafi öll kurl komið til grafar í því máli," segir Steinunn. Enn sé óupplýst um styrki til annarra frambjóðenda í öllum flokkum, frá öðrum fyrirtækjum en FL Group og Baugi.

Hún telur útstrikanirnar ekki veikja stöðu sína innan flokksins, enda hafi fleiri fengið að kenna á þeim en hún. „En ég tók á mig ákveðinn skell fyrir flokkinn. Það var flokksleg ákvörðun að halda prófkjör og þau kosta háar upphæðir." Steinunn vill nú byggja upp traust kjósenda að nýju.

Árni Johnsen, þingmaður Sjálfstæðisflokks, telur að þröskuldur útstrikana sé of lágur, auðvelt sé fyrir litla hópa að breyta röð á lista.

„Mér þykja þessar útstrikanir svolítið langsóttar aðferðir eftir velheppnuð prófkjör. Það geta alltaf verið ástæður fyrir útstrikunum, og við því er ekkert að segja, en mér finnst ekki mikið lýðræði í því að fimmtán prósent kjósenda geti ráðið meiru en hin 85 prósentin," segir Árni. Hann vill ekki tjá sig um hvort aðrir frambjóðendur Sjálfstæðis-flokks hafi unnið gegn honum í kjördæminu.0

Kolbrún Halldórsdóttir segist hafa spurt sig strax í prófkjörinu hvort grænar áherslur væru á undanhaldi í flokknum, þegar hún lenti þar í þriðja sæti. Hún segist enn vilja gegna starfi umhverfisráðherra, en missi ekki svefn yfir því. „Ég hef alltaf verið umdeild innan flokks og utan, og hef alltaf getað lifað með því. Það er líf eftir pólitík."

Ekki náðist í Guðlaug Þór Þórðarson, en hann var gagnrýndur í kosningabaráttunni fyrir að þiggja háa styrki frá FL Group og Baugi og fyrir að hafa haft milligöngu um styrki til Sjálfstæðisflokksins.

klemens@frettabladid.is