Námu fimmtán ára stúlku á brott og börðu í Heiðmörk

Fimmtán ára stúlka var göbbuð upp í bíl við heimili sitt í gær undir þeim formerkjum að hún væri að fara að sættast við stúlku sem hún hafði átt í útistöðum við. Fljótlega komu fimm aðrar stúlkur upp í bílinn, en þar voru tvær fyrir, og óku með hana upp í Heiðmörk. Þar gengu tvær þeirra í skrokk á henni svo stórsér á henni.

„Þetta byrjaði á einhverjum misskilningi á netinu. Hún hélt að hún væri að ræða við aðra stúlku á MSN og síðan var hún sökuð um að ljúga upp á einhverja stúlku. Sú þekkir þennan stelpnahóp," segir Hrönn Óskarsdóttir, systir fórnarlambsins.

Stúlkurnar, sem eru úr Hafnar-firði og litlu eldri en fórnarlambið, hittu stúlkuna fyrir nokkrum dögum á matsölustað og réðust þar á hana, en voru stöðvaðar fljótlega. Í gær hringdu þær síðan í hana, þóttust vilja biðja afsökunar og sættast við hana. Í staðinn færðu þær hana upp í Heiðmörk þar sem tvær þeirra hófu að lemja hana. Hún var lamin ítrekað í andlitið.

Stúlkan segir að hinar stúlkurnar hafi staðið hjá, nema ein sem hljóp að bíl sem var þar hjá. Drengur sem sat í þeim bíl, og virtist tengdur stúlkunum, kom og skakkaði leikinn. Stúlkunni var síðan ekið til Hafnarfjarðar, en hún býr í Reykjavík. Alla leiðina héldu stúlkurnar tvær áfram að lemja hana. Hún var skilin eftir í Hafnarfirði og hótað lífláti kjaftaði hún frá. Að skilnaði kröfðust stúlkurnar 150 þúsund króna, annars yrði hún drepin.

Stúlkan er óbrotin en mjög bólgin í andliti. Tekin var sneiðmynd af henni í gær og Hrönn segir að læknar hafi sagt að hurð hafi skollið nærri hælum. Hún hafi verið svo bólgin að eitt högg á ákveðinn stað hefði getað kostað hana lífið. „Það er í raun ótrúleg heppni að hún sé á lífi. Það hefur einhver vakað yfir henni," segir Hrönn.

Lögreglan staðfesti að stúlkan og fjölskylda hennar hefðu rætt við lögreglumenn og lýst málsatvikum með þessum hætti. Rannsókn væri á frumstigi og stúlknahópsins væri leitað. Hrönn segir systur sína hafa verið svo ringlaða á lögreglustöðinni að hún hafi verið send heim til að jafna sig áður en formlegri skýrslutöku yrði lokið. „Hún er alveg í sjokki og vill helst flytja af landi brott."- kóp