Reyna að fjölga ferðmönnum

Á Suðausturlandi eru ferðaþjónustuaðilar farnir að þróa verkefni sem lýtur að því að selja sjálfan veturinn. Markmið verkefnisins er að fjölga verulega í hópi þeirra ferðamanna sem leggja land undir fót inn í vetrarríki landshlutans í framtíðinni.

Þetta er eitt verkefni af mörgum sem byggir á samvinnu 80 fyrirtækja sem mynda svokallaðan ferðaþjónustu-, matvæla- og menningarklasa Suðausturlands. Klasinn er á svæði sem teygir sig frá Skeiðarárjökli í vestri að Lóni í austri. En hvað er verið að byggja upp?

„Erum að byggja upp grunngerð svæðisins. Erum til dæmis með fjallaverkefni með áherslu á vetrartímann og þar er til dæmis verkefni í tengslum við fjallaskála - gengið yrði frá grunnbúðum milli skála. Þetta er í fyrsta skipti sem slíkt yrði gert á Íslandi," segir Rósa Björk Halldórsdóttir, framkvæmdastjóri Ríki Vatnajökuls.

Það að hafa Vatnajökulsþjóðgarð innan seilingar gerir það að verkum að fjallaskálaverkefnið er raunhæft að mati Rósu. Þá ekki síður hitt að hægt er að komast upp á jökulinn allan ársins hring. Þann möguleika hyggjast menn bæta enn frekar. Meðal annars með kláfferju sem áætlað er að kosti 200 milljónir króna. Tilkoma slíkrar ferju myndi stórbæta allt aðgengi að jöklinum

„Við erum þegar byrjuð að vinna að þessu. Það er byrjað að vinna viðskiptaáætlanir og það er mikil samstaða á svæðinu og hér verður mikil uppbygging á næstu árum," segir Rósa.