Forsetinn kemst ekki í spurningakeppni

Sigmundur Davíð Gunnlaugsson, formaður Framsóknarflokksins, var sleginn út úr spurningakeppni á Morgunvakt Rásar 2 í morgun. Þegar Sigmundur var beðinn um að tilnefna þátttakanda til að mæta Atla Steini Guðmundssyni, sem hafði betur í viðureigninni í morgun, skoraði Sigmundur á Ólaf Ragnar Grímsson að mæta Atla Steini.

Lára Ómarsdóttir, stjórnandi Morgunvaktarinnar, segir í samtali við Vísi að Ólafur muni ekki eiga heimangegnt í keppnina af því að hann verði staddur erlendis. Hins vegar hafi hún óskað eftir því að Ólafur tilnefndi annan í sinn stað og hún vænti svars við þeirri beiðni á morgun.