Undarlegur erill hjá lögreglu í nótt

Talsverður erill var hjá lögreglunni á höfuðborgarsvæðinu í nótt. Að sögn varðstjóra þá var það eftir hálf fimm í nótt sem útköllum fjölgaði stórlega. Mikið var um slagsmál í miðbænum og í einu tilviki þurftu lögreglumenn að fara inn á skemmtistað í miðborginni til þess að aðstoða dyraverði við að stöðva áflogahunda. Það þykir óvanalegt.

Enginn slasaðist alvarlega í þeim slagsmálum sem lögreglan hafði afskipti af en að sögn varðstjóra þá þótti honum ekki ólíklegt að einhver slagsmálahundanna hefði nefbrotnað.

Sjö gistu fangageymslur lögreglunnar. Meðal annars fékk innbrotsþjófur að sofa úr sér en hann var gripinn glóðvolgur í Árbænum þar sem hann reyndi að brjótast inn á leikskóla. Þá fengu útigangsmenn að sofa úr sér í geymslum lögreglunnar auk manna sem sváfu úr sér áfengisvímuna vegna ölvunar og óspektar á almannafæri.

Mikið var um hávaðaútköll á höfuðborgarsvæðinu undir morgun. Útköllin voru víðsvegar um bæinn. Varðstjóri var undrandi á sinnaskiptum þeirra sem skemmtu sér í nótt. Hann segir að allt hafi beinlínis orðið brjálað eftir klukkan hálf fimm í nótt.