Albaníuferð þingmanna kostar á aðra milljón króna

Ferð Ástu Ragnheiðar Jóhannesdóttur, forseta Alþingis, varaforsetanna Steinunnar Valdísar Óskarsdóttur og Sivjar Friðleifsdóttur og Jörundar Kristjánssonar, alþjóðaritara á skrifstofu forseta Alþingis, kostar tæpar 1,4 milljónir króna.

Samkvæmt upplýsingum frá aðstoðarskrifstofustjóra Alþingis kostar ferðin 1396 þúsund krónur. Þar af er kostnaður vegna flugferða 1.090.000 og dagpeningar 300 þúsund krónur.

Karl Kristjánsson, aðstoðarskrifstofustjóri Alþingis, segir að fyrir utan ferðakostnað til Albaníu hafi verið um boðsferð á vegum Albanska þingsins að ræða. „Boð til Alþingis barst í fyrra. Það hefði mjög erfitt gagnvart gestgjöfum að draga ferðina lengur. Albanir voru í heimsókn á Íslandi tvisvar sinnum á síðasta ári. Ákveðið var að hafa lágmarksfjölda í sendinefndinni og senda 2 þingmenn í stað 5 eins og oftast áður í slíkum opinberum heimsóknum milli þjóðþinga," segir Karl í svari við fyrirspurn Vísis.

Eins og Vísir greindi frá í gær munu forseti Alþingis og varaforsetar meðal annars eiga fundi með forseta albanska þingsins og fulltrúum í Evrópunefnd þess. Þá munu þau einnig hitta að máli forsætisráðherra, utanríkisráðherra og mennta- og ferðamálaráðherra landsins.