Forseti Alþingis í Albaníu

Ásta Ragnheiður Jóhannesdóttir, forseti Alþingis, er í opinberri heimsókn í Albaníu í boði Jozefinu Topalli, forseta albanska þingsins. Heimsókn Ástu hófst í dag og lýkur á sunnudag.

Með Ástu í för eru Steinunn Valdís Óskarsdóttir og Siv Friðleifsdóttir, varaforsetar Alþingis, ásamt Jörundi Kristjánssyni alþjóðaritara á skrifstofu forseta Alþingis.

Í heimsókninni munu forseti Alþingis og varaforsetar meðal annars eiga fundi með forseta albanska þingsins og fulltrúum í Evrópunefnd þess. Þá munu þau einnig hitta að máli forsætisráðherra, utanríkisráðherra og mennta- og ferðamálaráðherra landsins.