Leiðtogar stjórnarandstöðunnar ræða ESB mál við ríkisstjórnina

Formenn allra stjórnararandstöðuflokkanna fara á fund forystumanna ríkisstjórnarinnar í stjórnarráðinu í fyrramálið þar sem drög að þingsályktun um aðildarviðræður að Evrópusambandinu verður rædd. Ályktunin verður lögð fram á Alþingi fljótlega eftir að það kemur saman á föstudag. Gera má ráð fyrir að allir þingmenn Samfylkingar kjósi með tillögunni og nokkrir úr röðum vinstri grænna.

Þá hafa Framsóknarflokkurinn og Borgarahreyfingin lýst því yfir að þeir vilji aðildarviðræður að settum ákveðnum skilyrðum. Verði þingsályktunin samþykkt verður umsókn um aðild send til Evrópusambandsins um mánaðarmótin júní júlí.