Geðheilsuvefur opnaður við HÍ

Sigurður Guðmundsson, forseti Heilbrigðisvísindasviðs, opnar sérstakan vef um geðheilbrigði við Háskóla Íslands á morgun klukkan tvö í Háskólatorgi. Markmið vefsins er að skapa jákvæða umræðu um geðheilsu og vekja athygli fólks á hárri tíðni álagsþátta meðal háskólanema. Einnig er ætlunin að auka þekkingu stúdenta, starfsfólks og almennings á einkennum helstu geðraskana og veita upplýsingar um þá þjónustu sem er í boði hér á landi.

Þessari nýju upplýsingamiðlun er þannig í senn ætlað að upplýsa nemendur, starfsfólk Háskóla Íslands og almenning um stuðningsúrræði og vinna gegn fordómum í garð geðraskana.

Efni geðspekivefsins er sett fram á skýran og afar aðgengilegan hátt og vekur hann athygli á því álagi sem fylgir því að vera í námi. Þannig geta nemendur áttað sig sem best á streituvöldum og áhættuþáttum sem eðlilega tengjast akademísku samfélagi og brugðist við þeim.

Geðspekivefurinn er samstarfsverkefni þriggja fræðigreina innan háskólans en að verkinu komu jafnt nemendur og kennarar. Nemendur sem unnu í verkefninu eru Þorgerður Hafstað úr hjúkrunarfræði, Sigríður Einarsdóttir, MA nemi í bókasafns og upplýsingafræði og Ragnheiður Sif Gunnarsdóttir MA nemi í sálfræði.

Kennararnir sem unnu að vefnum nýja eru þær Ágústa Pálsdóttir, dósent í bókasafns- og upplýsingafræði, Jóhanna Bernharðsdóttir, lektor í hjúkrunarfræði og Zuilma Gabríela Sigurðardóttir, dósent í sálfræði. Zuilma Gabríela mun flytja stutt ávarp á morgun við opnun vefsins fyrir hönd aðstandendanna.

Í tilkynningu frá Háskóla Íslands segir að markmið aðstandenda vefsins sé að hafa á einum stað fræðsluefni tengt geðheilsurækt, áhrif streitu og helstu einkenni geðraskana í þeim tilgangi að dýpka þekkingu á geðheilbrigði, áhættuþáttum, meðferðarúrræðum og stuðla að geðheilbrigði.

Vefurinn verður öllum opinn og er á slóðinni http://www.ged.hi.is/