Borgin biðst vægðar en sýnir sjálf enga miskunn

Borgarfulltrúar kveinka sér nú undan því að húsaleigan sem borgin þarf að greiða í byggingu við Borgartún hafi hækkað úr 1.800 krónum upp í 3.000 krónur á fermetra vegna vísitöluhækkunar og heimta núna lækkun. Hvernig væri að þeir spyrðu sig fyrst hvernig borgin og önnur sveitarfélög hegðuðu sér gagnvart fasteignaeigendum þegar húsnæðisbólan sprengdi upp fasteignaverð?

Þannig tvöfölduðu sveitarfélögin tekjur sínar af fasteignasköttum atvinnuhúsnæðis milli áranna 2004 og 2008, úr 6,8 milljörðum króna upp í 13,6 milljarða. Álagning Reykjavíkurborgar á atvinnuhúsnæði fór á þessum árum úr 3,7 milljörðum upp í 7,4 milljarða, meira en tvöfaldaðist meðan vísitala neysluverðs hækkaði um 31 prósent. Þarna spilaði saman fjölgun fermetra og stórhækkun fasteignamats. Tölurnar sýna að sveitarfélögin í landinu með Reykjavíkurborg í fararbroddi sýndu enga miskunn á síðustu árum þegar þau dúndruðu fasteignaskattshækkunum yfir atvinnureksturinn.

Vilhjálmur Egilsson, framkvæmdastjóri Samtaka atvinnulífsins, segir að það sem skipti mestu máli sé að núna, þegar fasteignaverð er á mikilli niðurleið, þá fylgi sú lækkun yfir á fyrirtækin þannig að sveitarfélögin bregðist ekki við lækkun fasteignamats með hækkun skattprósentu.

En sveitarfélögin áfram því ASÍ benti í dag á margskyns gjaldahækkanir þeirra um nýliðin áramót. Reykjavík hækkaði vatnsgjald um 27%, Kópavogur gekk enn lengra og hækkaði vatnsgjald, holræsagjald, lóðaleigu, sorphirðugjald og útsvarið. Hafnarfjörður hækkaði útsvar og sorphirðugjald en lækkaði vatnsgjald. Á Akureyri hækkuðu fasteignaskattar, sorphirðan og vatnið verulega en holræsagjaldið lækkaði. Akranesbær var með þeim sveitarfélögum sem lengst gengu en allra verstu útreiðina fengu íbúar sveitarfélagsins Skagafjarðar, sem máttu þola 50 prósent hækkun sorphirðugjalds og 58 prósenta hækkun lóðarleigu, auk annars.

Gylfi Arnbjörnsson, forseti Alþýðusambands Íslands, segir að í haust hafi samtök sveitarfélaga hvatt sveitarfélög til þess að halda aftur af sér í skattahækkunum og fara í gegnum þetta ástand án þess að íþyngja borgurunum. Þegar upp sé staðið sjái menn að þetta séu mjög miklar hækkanir, sem lendi á heimilunum í þessu erfiða árferði. Þetta komi mönnum í opna skjöldu.