Krefst fundar í viðskiptanefnd vegna afskrifta hjá Högum

Eygló Harðardóttir, þingmaður Framsóknarflokksins, hefur farið fram á að viðskiptanefnd Alþingis komi saman vegna frétta um afskriftir af skuldum eigenda Haga við Kaupþing.

Eignarhaldsfélagið 1998 sem á Haga skuldar Kaupþingi 48 milljarða króna. Endurskipulagning á eignarhaldi Haga stendur yfir þessa dagana en tveir fulltrúar frá nýja Kaupþingi hafa þegar tekið sæti í stjórn 1998. Samkvæmt heimildum fréttastofu er samkomulag á teikniborðinu sem gerir ráð fyrir að Kaupþing eignist 40% í Högum og Jón Ásgeir Jóhannesson og viðskiptafélagar hans 60% gegn því að leggja fram sjö milljarða króna. Þetta myndi þýða tugmilljarða afskriftir hjá 1998 ehf.

„Ég vil fá nánari útskýringar á því hvað Kaupþing er að gera þarna. Þetta er alls ekki í samræmi við það sem við framsóknarmenn höfum verið að tala um varðandi gegnsæi og jafnræði þegar kemur að afskriftum skulda," segir Eygló.

Þá segir hún að þetta sé ekki í samræmi við fyrri yfirlýsingar Steingríms J. Sigfússonar, fjármálaráðherra, um aðrar sambærilegar afskriftir. Hún undrast ekkert skuli heyrast í ríkisstjórninni vegna málsins.

Eygló segir að Lilja Mósesdóttir, þingmaður VG og formaður viðskiptanefndar, hafi tekið vel í erindi sitt. Eygló á von á því að fundurinn verði haldinn fljótlega.