Fær Kaupþing Bónus?

Tveir starfsmenn Kaupþings hafa verið skipaðir í stjórn móðurfélags Haga. Félagið er nú skráð í höfuðstöðvum Kaupþings. Jón Ásgeir Jóhannesson og fjölskylda hafa nokkrar vikur til að koma með nýtt fé í reksturinn - takist það ekki lenda Hagar í ríkiseigu.

Tilkynnt var fyrir um viku að Hagar hefðu lokið endurfjármögnun félagsins í samstarfi við Landsbankann og Kaupþing. Í tilkynningu frá Högum kom fram að félagið hefði greitt að fullu skuldabréfaflokk þess, upphaflega 7 milljarða króna. Hagar eru í eigu félagsins 1998 hf. sem er í eigu Jóns Ásgeirs Jóhannessonar og fjölskyldu.

Stjórn 1998 hefur verið skipuð þeim Ingibjörgu Pálmadóttur, Hreini Loftssyni og Kristínu Jóhannesdóttur. Þau eru ekki lengur skráð í stjórn félagsins en Sigurjón Pálsson og Regin Freyr Mogensen, lögmenn sem starfa hjá Kaupþingi eru nú komnir í stjórn auk Jóhannesar Jónssonar sem kenndur er við Bónus. Þá hefur heimilisfang félagsins einnig verið flutt í höfuðstöðvar bankans.

Jóhannes segir að þegar endurfjármögnunin hafi verið gerð hafi verið gerður skriflegur samningur milli Kaupþings og eigenda félagsins að auka hlutafé í því.