Engin ákvörðun verið tekin um afskriftir hjá 1998

Finnur Sveinbjörnsson, bankastjóri nýja Kaupþings, segir að ekkert hafi verið afskrifað af skuldum eigenda Haga við bankann. Bankinn sé að vinna í málinu, og farið sé yfir ýmisskonar valkosti í þeim efnum. Ótímabært sé að vera með vangaveltur um afskriftir.

Eignarhaldsfélagið 1998 sem á Haga skuldar Kaupþingi 48 milljarða króna. Endurskipulagning á eignarhaldi Haga stendur yfir þessa dagana en tveir fulltrúar frá nýja Kaupþingi hafa þegar tekið sæti í stjórn 1998. Finnur Sveinbjörnsson, bankastjóri Kaupþings, segir ekkert hafa verið afskrifað af skuldum 1998 við bankann.

Samkvæmt heimildum fréttastofu er samkomulag á teikniborðinu sem gerir ráð fyrir að Kaupþing eignist 40% í Högum og Jón Ásgeir Jóhannesson og viðskiptafélagar hans 60% gegn því að leggja fram sjö milljarða króna. Þetta myndi þýða tugmilljarða afskriftir hjá 1998 ehf.

Aðspurður hvort afskriftir komi til greina segir Finnur að verið sé að vinna í málinu innan bankans og eru ýmsir valkostir skoðaðir í þeim efnum. Ótímabært sé hinsvegar að segja til um hver endanleg niðurstaða í málinu verði.