Verksmiðja sem breytir mengun í eldsneyti rís í Svartsengi

Byltingarkennd verksmiðja, sem breytir útblæstri jarðgufuvirkjana og álvera í metanól, verður reist í Svartsengi og verður fyrsta skóflustunga tekin í næstu viku.

Hver gæti trúað því að verðmæti gætu falist í stróknum sem stígur upp frá virkjunni í Svartsengi? Greinilega hluthafarnir fjörutíu í félaginu Carbon Recycling International, sem eftir þriggja ára undirbúning setja einn milljarð króna í smíði verksmiðju sem verður einstök í heiminum.

Tilraunaverksmiðja hefur verið rekin í eitt og hálft ár í kjallara Háskólans í Reykjavík á Höfðabakka í samvinnu íslenskra og erlendra vísindamanna, undir stjórn bandaríkjamannsins Kims Tran, en meðal ráðgjafa er bandarískur nóbelsverðlaunahafi í efnafræði. Verksmiðjan mun nota koltvísýring úr borholum Svartsengis til að framleiða metanól, öðru nafni tréspíritus, sem meðal annars er notað sem íblöndunarefni í bensín en einnig beint sem eldsneyti.

Aðstandendur félagsins segja að framleiðslan muni vinna gegn loftlagsvanda heimsins. Sindri Sindrason, stjórnarformaður Carbon Recycling International, segir að meira sé notað af koltvísýringi í framleiðslu metanólsins en sem myndast við bruna þess þegar það er notað sem eldsneyti. Fleiri mengunarvaldar koltvísýring hérlendis gætu gagnast, og kannski aukið losunarkvóta Íslands, en vinna má hann úr útblæstri frá álverksmiðjum og öðrum mengandi iðnaði.

Milli 30 og 40 manns fá vinnu við smíði verksmiðjunnar en þar munu síðan starfa 5-6 manns við framleiðsluna. Verksmiðjan á að framleiða fimm milljónir lítra þegar hún tekur til starfa eftir eitt ár og síðan er áformað að byggja enn stærri verksmiðju. Hugmyndin er að græða á öllu saman og segir Sindri dæmið líta glettilega vel út. Þeir væru ekki að þessu nema þeir sæju af þessu fjárhagslegan ávinning.