Grunur leikur á íkveikju

Allt tiltækt lið slökkviliðs var kallað út þegar tilkynnt var um eld í húsinu við Skólavörðustíg 40 laust fyrir klukkan 15 í gærdag. Húsið var mannlaust þegar slökkvilið og lögregla komu á staðinn og gekk slökkvistarf vel. Töluverðar skemmdir urðu á húsinu. Grunur leikur á íkveikju.

Eldurinn kom upp í risi hússins. Samkvæmt varðstjóra hjá slökkviliðinu var tilkynnt um eldinn af vegfarendum sem áttu leið hjá. Sömu vegfarendur fóru inn í húsið og gengu úr skugga um að enginn væri á neðri hæðunum tveimur. Nokkuð ljóst væri að um íkveikju hafi verið að ræða.

Lögregla ræddi í gær við þrjá unga menn sem sáust hlaupa frá húsinu í þann mund sem eldurinn blossaði upp. Enginn var þó handtekinn og mönnunum sleppt.

Húsið er í eigu félagsins Samtímalistar ehf. sem rekur listagalleríið Turpentine neðar á Skólavörðustíg. Húsið hafði staðið autt í nokkurn tíma áður en hústökufólk settist þar að í ágúst síðastliðnum. Sá hópur opnaði þar meðal annars félagsrými og fríbúð í september. Að sögn varðstjóra hjá lögreglu er ekki vitað hvort hústökufólkið hafðist enn við í húsinu fyrir brunann. Rafmagn hafði verið tekið af húsinu.

Sindri Sindrason, einn af eigendum Samtímalistar ehf., segir að til hafi staðið að rífa húsið og byggja á reitnum. Erindi þess efnis hafi verið til úrvinnslu í kerfinu í mörg ár. Eigendurnir hafi ákveðið að aðhafast ekki vegna hústökufólksins. - kg