Stjórnmálamaður boðar byltingu

Magnús Þór Hafsteinsson varaformaður Frjálslynda flokksins segir byltingu í aðsigi.

Magnús er búinn að vera utan við alþingishúsið í allan dag, og er þar enn að fylgjast með og spjalla við fólk. Í pistli sem hann ritar á heimasíðu sína segist þjóðina vera að lifa sögulega tíma.

Bylting sé í aðsigi. Eina leiðin til að komast úr vandræðum landsins sé að ganga til algerrar uppstokkunar á íslensku samfélagi. Fá nýja stjórnarskrá, nýtt lýðveldi, nýtt alþingi, nýjar sveitastjórnir, nýjan forseta.

„Öðruvísi komumst við aldrei út úr þessu. Og það verður engin stjórnarkreppa þó þetta verði gert. Ekki láta ríkisstjórn Samfylkingar og Sjálfstæðisflokks ljúga því að ykkur. Þau eru bara að hugsa um að halda völdum fyrir sig og sína. Málið er nefnilega að versta stjórnarkreppa lýðveldistímans er búin að standa yfir síðan í byrjun október," skrifar Magnús. „Henni verður nú að linna með því að við höggvum á hnútinn. Þjóðin losar sig við kvalara sína."