Sérsveitin flytur á Miðnesheiði

Haraldur Johannessen ríkislögreglustjóri og Ellisif Tinna Víðisdóttir, forstjóri Varnarmálastofnunar, hafa undirritað samning um afnot ríkislögreglustjóra að mannvirkjum á mannvirkjaskrá Atlantshafsbandalagsins.

Samningurinn gerir það að verkum að Sérsveit Ríkislögreglustjóra mun flytja æfingaaðstöðu sína frá Hvalfirði þar sem hún hefur verið í mörg ár og á nýtt svæði á Miðnesheiði. Ríkislögreglustjóri fær alls til afnota fimm byggingar og afmarkað svæði á Miðnesheiði sem einnig myn nýtast lögreglunni í landinu og Lögregluskólanum.

Í tilkynningu frá Ríkislögreglustjóra segir að samningurinn skapi lögreglunni ný tækifæri til margs konar æfinga og aukins samstarfs við Landhelgisgæslu Íslands, sem hefur einnig aðstöðu á Miðnesheiði, samkvæmt fyrirliggjandi samstarfssamningi ríkislögreglustjóra og Landhelgisgæslunnar um löggæslu, björgun og almannavarnir.