Fjórtán féllu í gildru lögreglu við Gullteig

Fjórtán voru staðnir að hraðakstri á Gullteig í Reykjavík í gær en þar var staðsett ómerkt lögreglubifreið sem er búin myndavélabúnaði.

Að sögn lögreglu hefur reynslan sýnt að notkun slíks búnaðar gefi gagnlegar upplýsingar um ástand umferðarmála og auðveldi leit að lausnum þar sem þeirra er þörf. Mælingarnar í gær eru hluti af sérstöku umferðar- og hraðaeftirliti í umdæminu.

Eins og fyrr sagði voru brot 14 ökumanna mynduð á Gullteig en fylgst var með ökutækjum sem var ekið í suðurátt, að Silfurteig. Á einni klukkustund, eftir hádegi, fóru 64 ökutæki þessa akstursleið og því óku 22% ökumanna of hratt eða yfir afskiptahraða. Meðalhraði hinna brotlegu var 44 km/klst en þarna er 30 km hámarkshraði. Sá sem hraðast ók mældist á 55.

Fyrir ári var lögreglan við hraðamælingar á þessum sama stað á Gullteig og þá óku 25% ökumanna of hratt eða yfir afskiptahraða en þá var aðeins minni umferð um götuna (57 ökutæki). Meðalhraði hinna brotlegu í fyrra var 42 km/klst.